muhunong sa ko'g iningles uy
gikapoy na ko
mao ra gihapon
naa ra gihapon ko's cebu
muhunong sa ko'g iningles
wa bitaw ko gatrabaho'g call center
wa man sab ko ga-tutor ug koreano
wa naman pud ko gaskwela
nga kung magbinisaya bayad piso
muhunong sa ko'g iningles.
Bag-o ra gi-deny akong ate sa iyang visa
mapalitan na unta ko'g laptop, yati ra
barato man didto, i-hand-carry niya pauli
di ko kagasto'g shipment, state-side pa
muhunong sa ko'g iningles
samtang natanggong ko dire
kuyog sa akong mga pan-os nga kadamguhan
ug mga kahadlok nga kung mauwanan managhan
muhunong sa ko'g iningles.
Di ko ganahan maaang taga-call center
o nursing nga nag-call center
o undergrad nga nag-call center
o engineer nga nag-call center
o abogado nga nag-call center
o teacher nga nag-call center
o gapakaaron-ingnong taga-call center
muhunong sa ko'g iningles
kay OA kaayo paminawn ganiha sa dyip
pagkuot nako's bulsa, akong sinsilyo syete ra
ningyati, ang plete, otso na ra ba
kanang gisapot ka ba padung trabaho
niya ang konduktor sige'g padungogdungog
SHIT MAN, I ONLY GOT SEVEN. pastilan.
"shit man, shit man" plete ra diay gihisgutan
muhunong sa ko'g iningles
para makatarong ko'g pamalikas
kolera. pisti. yawa. litsi. atay. minatay.
mas lami man paminawon, suwayi ay
muhunong sa ko'g ingingles
magkat-on ko'g daghan binisaya
kay kung madayon akong plano
nga puhon mu-apas ni kuya sa fresno,
kung awayon man gani ko didto
(bisan di ko ipa-away ingon si mama)
ug kung sungugon ko's akong pagkaputot
(kay tinood, putot man gyud ko)
yawyawan lang nako sila'g
di nila masabtan
bisan ako nahadlok unya sila mga isog,
luspad gihapon ilang mga itlog.
