Gahapun, padulong ko dire
Karun ni-abot ko didto
Ganina nilakaw ko gapalayo sa ugma
ug karun ni-apas ang kaganina nako
Lisod na ni
Kapoy ang maggukod
sa nadakpan na
Ganina unta ang angayan karun
ug ang ugma mas angayan gahapun
pero ni-abot na ko dire
gikan didto sa akong gipadulngan karun
Ing-ani man gud ni:
ang ganina ug gahapun
ug ang ugma ug karun
kanunay magkabali-os
ug ako kanunay nilang
malabyan ug mabiyaan
ug ang karun ug ganina
ug ang ugma ug gahapun
kanunay pud nakong
mabiyaan ug malabyan
Busa mupuyo nalang ko,
magpahimutang dire,
sa akong puesto
sa akong lawas
Ug maghuwat nga ang karun ug gahapun
Ug ang ugma ug ganina
magtagbo sa akong tungod
ug maghusay ming tanan
aron human,
manamilit ko nila og dungan
