"Sayanga nimo uy" ingon ka,
Gamit imong simod nga mga murag lubot sa baka
Ug nganong sayang man ko?
Kay di ko mupatol nimo? Kay babay ka?
Sa tinuod lang day, mupatol man gihapon ko'g babay,
pero muputi nalang ang uwak, di gihapon ko mupaak
anang imong pahiyom nga murag tiyanak
Ayaw lang laina pagsabot day
Kung nganong sa imo, dali kaayo ko manglagot
Ug kung nganong sa imo, di nako mada magbinutbot
Dili man tungod kay bati ka’g nawong ba
bisan runner-up ra ka sa talong nga gisugba
gipanitan ug gitorta, gitilawan ug giluwa
kay pirting parata pagkaluto-a
Dili pud tungod kay wa kay kwarta
Kay parehas ra man tang gasiga ang mata
gipangkapoy sa pagpangita'g kaayuhan, galaroylaroy
samtang kanunayng gainom ug gamaoy
Dili tungod kay pirting daku-a ana imong baba, miss
Nga kung mukanta puydi agi-an og ceres,
kung mukatawa masudlan ug superferry
ug kung musyagit murag nakaluwa sa tibuok SRP
Dili pud tungod sa imong lawas
Nga mas bug-at pa’s napu ka sakong bugas
Gipatongpatong, Giputos ug tube, ug tsenen-
Snowman de Pilipinas!
Dili pud tungod kay putot ka
kay putot man pud ko, klaro man na diba?
Pero mas putot gihapon ka
may nalang ko, gikaluy-an bisan gamay
di pareha nimo day-
putot,
di mapasyalo ang katambok,
sabaan, way batasan,
ang dagway kulang nalang og sungay,
ug baho pa gyud og baba.
Pero di gihapon day,
di tungod anang mga butanga
nganong di gyud ko munganga
mu-usap ug mutulon anang imong kumbira
Simple ra man ba,
tungod kay BUGO ka.
Kay ang imong konsepto sa sayang kay laki nga gwapo
nga dili gyud, i repeat, dili gyud ma-imo
Kay ang sayang para nimo kay laki nga tinuod
Tinuod sa iyang kaugalingon, sa uban tao, sa ginoo, ug bisan sa imo,
Kay ang sayang para nimo kay laki nga musukol
sa panghinaway, bugalbugal, ug mga panuway
nga gitawag og pihig ug way rasong panglupig
Kay ang sayang para nimo kay laki nga kibaw mutuo
bisan siya nag-inusara, bisan wala siyay kuyog
Busa una ka musulti nga sayang ko
kuyog sa tanang ubang tao nga pareha nako ug di pareha nimo:
di pareha sa dagway’ sa imong kalag ng murag balay nga gi-anay
di pareha sa imong kapobre sa pamatasan ug kadato sa pagmahay
di pareha sa katambok sa imong garbo nga walay unod bisan gamay
di pareha sa imong baba nga way masulting matahom ug matinabangon
Ug dili pareha sa pagkaputot og pagkamubo sa imong panan-aw ug pagmatngon
Una ka musulti nga sayang ko, nga sayang mi-
Tan-awa sa kuno na imong kaugalingon beh.
